Yearly Archives: 2021

ဆေးပညာပိုင်းဆိုင်ရာတည်းဖြတ်သူ Dr. Thurein Hlaing Win | ရေးသားသူ Dr.Thant Zin

Green Tea ဟာ ရုက္ခဗေဒအမည် Camellia sinensis လို့ဆိုတဲ့ လက်ဖက်ပင်ရဲ့ အရွက်ကနေ ထုတ်လုပ်ထားခြင်း ဖြစ်ပါတယ်။ Oo Long Tea နဲ့ black tea ဆိုတာတွေလည်း လက်ဖက်ရွက်ကနေပဲ ထုတ်လုပ်ထားပြီး ပြုလုပ်တဲ့အဆင့်ပဲ ကွာခြားသွားခြင်း ဖြစ်ပါတယ်။ မြန်မာလူမျိုးများ သောက်သုံးတဲ့ လက်ဖက်ရည်ကြမ်းနဲ့လည်း သဘောတရားအတူတူပဲ ဖြစ်ပါတယ်။ Green tea ကိုတော့ လက်ဖက်စိမ်း လက်ဖက်ရည်လို့လည်း ညွှန်းကြပါတယ်။

Green Tea သောက်ခြင်းဟာ ကျန်းမာရေးကို အထောက်အကူပြုတယ်ဆိုတာ အားလုံးသိပြီးကြပြီး ဖြစ်ပါတယ်။ ဓါတ်တိုးဆန့်ကျင်တဲ့ ဂုဏ်သတ္တိရှိခြင်း၊ ကိုလက်စထရောကို လျှော့ချပေးခြင်း၊ ဆီးချိုကို ကာကွယ်ပေးနိုင်ခြင်း စတဲ့အကျိုးကျေးဇူးတွေ ရရှိနိုင်ပါတယ်။

ဒါဆိုရင် နေ့စဉ် လက်ဖက်ရည်ကြမ်း Green Tea ကို များများသောက်နိုင်လေ၊ ပိုကောင်းလေလား။

ဒီနေရာမှာ စဉ်းစားဖို့က ဘယ်နေရာမှာမဆို တန်ဆေး လွန်ဘေး ဆိုတဲ့သဘောတရား ရှိနေတယ်ဆိုတာပါပဲ။

လက်ဖက်ရည်ကြမ်း Green Tea သောက်သုံးခြင်းဟာ ဘေးထွက်ဆိုးကျိုးတွေ ဖြစ်နိုင်သလား
လက်ဖက်ရည်ကြမ်း Green Tea သောက်ခြင်းရဲ့ အကျိုးကျေးဇူးတွေကို အတော်များများ ကြားသိဖူးကြလို့ ဒီဆောင်းပါးမှာတော့ ထပ်ပြီး မဖော်ပြတော့ပါဘူး။ Green Tea ကြောင့်ရရှိနိုင်တဲ့ ဘေးထွက်ဆိုးကျိုး အချို့ကိုပဲ ဖော်ပြပေးသွားလိုပါတယ်။

သံဓါတ်စုပ်ယူမှု လျော့ကျစေခြင်း

Green tea မှာပါဝင်တဲ့ တန်နင်ဆိုတဲ့ ဓါတ်ပစ္စည်းဟာ သင့်ကိုယ်ခန္ဓါကနေ သံဓါတ်စုပ်ယူမှုကို လျော့နည်းစေပါတယ်။ တော်သင့်ရုံသောက်သုံးခြင်းဟာ ပြသနာမရှိပေမယ့် စွဲစွဲမြဲမြဲသောက်သုံးနေသူများ အနေနဲ့ သတိချပ်ရမှာ ဖြစ်ပါတယ်။ အထူးသဖြင့် သံဓါတ်ချို့တဲ့ သွေးအားနည်းရောဂါရှိသူတွေ၊ သက်သတ်လွတ်စားသူတွေ၊ ကိုယ်ဝန်ဆောင်မိခင်တွေ၊ ဓမ္မတာကာလကြုံနေသူ အမျိုးသမီးတွေ၊ ကလေးငယ်တွေဟာ green tea ကို အထူးသတိပြုသောက်သုံးသင့်ပါတယ်။

သုတေသနအချို့အရ ထမင်းစားနေတုန်း လက်ဖက်ရည်ကြမ်း သောက်သုံးတာက သံဓါတ်စုပ်ယူမှုကို ၃၀-၆၀ ရာခိုင်နှုန်း လျော့ကျစေတယ်လို့ သိရပါတယ်။

ဒါကြောင့် သံဓါတ်အခံ အားနည်းသူများ၊ သွေးအားနည်းသူများဟာ ထမင်းစားနေစဉ်မှာ လက်ဖက်ရည်ကြမ်း မသောက်သုံးသင့်ပါဘူး။ အစာစားပြီး တစ်နာရီလောက်ခြားပြီးမှ လက်ဖက်ရည်ကြမ်း သောက်သင့်တယ်လို့ ဆိုပါတယ်။ အပြန်အလှန်ဆိုရရင် လက်ဖက်ရည်ကြမ်းသောက်ထားချိန်မှာလည်း တစ်နာရီလောက်နေပြီးမှ ထမင်းစားသင့်တယ်လို့ ဆိုပါတယ်။

ကဖိန်း၏ အကျိုးသက်ရောက်မှု

Greent tea မှာလည်း ကဖိန်းဓါတ်ပါဝင်တာမို့ လွန်ကဲစွာသောက်သုံးရင် စိတ်ပူပန်ခြင်း၊ အိပ်မပျော်ခြင်း၊ အစာအိမ်မအီမသာဖြစ်ခြင်း၊ ခေါင်းကိုက်ခြင်း စတဲ့ဝေဒနာတွေ ဖြစ်ပေါ်လာတတ်တယ်လို့ သိရပါတယ်။ ကိုယ်ဝန်ဆောင်အမျိုးသမီးတွေမှာ ကဖိန်းဓါတ်အများအပြား သောက်သုံးမိရင် ကလေးမှာမွေးရာချို့ယွင်းချက် ဖြစ်ပေါ်နိုင်ခြေ၊ ကလေးပျက်ကျနိုင်ခြေ မြင့်စေတယ်လို့ ဆိုပါတယ်။ သုတေသနတွေအရ ကိုယ်ဝန်ဆောင်အမျိုးသမီးတွေဟာ တစ်နေ့ကို ကဖိန်းဓါတ် ၃၀၀ မီလီဂရမ်အထက် မကျော်လွန်သင့်ဘူးလို့ ဆိုပါတယ်။

Green tea တစ်ခွက်မှာတော့ ပျမ်းမျှအားဖြင့် ကဖိန်းဓါတ် ၂၀နဲ့ ၄၀ မီလီဂရမ်အကြား ပါဝင်တယ်လို့ သိရပါတယ်။

တစ်နေ့ကို ဘယ်လောက်သောက်သုံးသင့်သလဲ

ဖော်ပြခဲ့ပြီးတဲ့ ဘေးထွက်ဆိုးကျိုးတွေဟာ လွန်ကဲစွာ သောက်သုံးမှသာ ရရှိနိုင်တဲ့ ဘေးထွက်ဆိုးကျိုးတွေ ဖြစ်ပါတယ်။ ဒါကြောင့် ဘယ်နှုန်းထားလောက်ကို သောက်သုံးသင့်သလဲဆိုတာ သိထားသင့်ပါတယ်။

သုတေသနတွေအရ တစ်နေ့တာသောက်သုံးသင့်တဲ့ green tea ပမာဏကတော့ ၃ခွက်ကနေ ၅ခွက်အထိ ဖြစ်ပါတယ်။ များသောအားဖြင့် Green tea သောက်သုံးခြင်းကြောင့် ရရှိတဲ့ အကျိုးကျေးဇူးဟာ ဆိုးကျိုးတွေထက်စာရင် အလွန်များပြားပါတယ်။ ဒါပေမယ့် ဘယ်နေရာမဆို တန်ဆေး လွန်ဘေးဆိုတဲ့ စကားရပ်ကို အမှတ်ရသင့်ပါတယ်။

Green tea ကို သင့်တင့်မျှတစွာ သောက်သုံးခြင်းဖြင့် မိမိကျန်းမာရေးကို မြှင့်တင်ကြပါစို့။

Credit: Hello Health Group

ဆေးပညာပိုင်းဆိုင်ရာတည်းဖြတ်သူ Dr. Kaung Thar | ရေးသားသူ Yun Sandi Nan Mon

သီဟိုဠ်စေ့က နှလုံးကျန်းမာရေး၊ အာရုံကြောကျန်းမာရေး၊ ကြွက်သားလုပ်ဆောင်ချက်ကောင်းမွန်စေခြင်း၊တို့လို ကျန်းမာရေးအကျိုးကျေးဇူးတွေအပြင်သွေးအားနည်းခြင်း၊ ဆီးချိုရောဂါတို့လိုရောဂါအခြေအနေတွေကိုပါ သက်သာလျော့ပါးစေနိုင်တဲ့ အစေ့အဆံတစ်မျိုးဖြစ်ပါ တယ်။ ဓါတ်တိုးဆန့်ကျင်ပစ္စည်းတွေပါဝင်တာကြောင့်လည်းသွေးနီဥဆဲလ်ဖြစ်ပေါ်မှုကို ကူညီပေးပြီး ကိုယ်ခံအားကိုကောင်းစေပါတယ်။

သီဟိုဠ်စေ့ရဲ့အာဟာရတန်ဖိုး

သီဟိုဠ်စေ့မှာ အာဟာရဓါတ်ပြည့်ဝတဲ့အပြင်ကော့ပါး၊ ကယ်လ်စီယမ်၊ မဂ္ဂနီဆီယမ်၊ သံဓါတ်၊ပိုတက်စီယမ်နဲ့ဇင့်အပါအဝင် သတ္ထုဓါတ်တွေနဲ့ ပရိုတင်းတွေပါဝင်ပါတယ်။ သူ့မှာ ဗီတာမင်C ၊B1(thiamin)၊ B2(riboflavin) ၊B3(niacin)၊B6၊ folate ၊ ဗီတာမင် E(alpha-tocopherol) နဲ့ ဗီတာမင် K(phylloquinone) တို့ပါဝင်တဲ့အပြင် သင့်တင့်စွာ စားသုံးမယ်ဆိုရင် monounsaturated အဆီတွေနဲ့polyunsaturated အဆီတွေ၊ အကျိုးပြုကိုလက်စထရောတွေကိုကောင်းမွန်စွာထိန်းသိမ်းနိုင်ပါတယ်။

ကျန်းမာရေးအကျိုးကျေးဇူးများ

သီဟိုဠ်စေ့ရဲ့ ကျန်းမာရေးအကျိုးကျေးဇူးတွေကတော့ –

(၁) နှလုံးရောဂါကာကွယ်ပေးခြင်း

သီဟိုဠ်စေ့ဟာ အဆီမှာပျော်ဝင်လွယ်တဲ့ ဗီတာမင် A ၊ D၊E ၊ K တို့ကို စုပ်ယူနိုင် ဦးနှောက်ဖွံ့ဖြိုးမှုနဲ့သွေးခဲပိတ်ဆို့ခြင်းတို့အတွက် အရေးပါတဲ့ အကျိုးပြုအဆီတွေ၊ ဦးနှောက်ဖွံ့ဖြိုးမှုနဲ့သွေးခဲပိတ်ဆို့မှုအတွက် အဓိကကျတဲ့ အဆီအက်စစ်တွေပါဝင်ပါတယ်။ စားသုံးပုံမှန်ကန် မယ်ဆိုရင် ဒီအဆီဓါတ်တွေက ဆိုးကျိုးပေးတဲ့ကိုလက်စထရော(LDL cholesterol)တွေကိုလျှော့ချပေးနိုင်ပြီး နှလုံးအတွက် အကျိုးပြုပါတယ်။

(၂) ကြွက်သားနဲ့အာရုံကြောအားကောင်းစေခြင်း

သီဟိုဠ်စေ့တွေမှာ အရိုး၊ကြွက်သား၊တစ်ရှူးနဲ့ ကိုယ်တွင်းအင်္ဂါအစိတ်အပိုင်းတွေကျန်းမာဖွံ့ဖြိုးမှုအတွက် အရေးပါတဲ့ မဂ္ဂနီဆီယမ်ပါဝင်ပါတယ်။ မဂ္ဂနီဆီယမ်ကသွေးဖိအားကိုထိန်းညှိပေးပြီး ကိုယ်ခံအားကောင်းစေ၊ အာရုံကြောလုပ်ဆောင်ချက်ကောင်းစေတဲ့အပြင် အရိုးကို သန်မာစေပါတယ်။ အင်ဆူလင်လုပ်ဆောင်ချက်ကိုလည်း ထိန်းညှိပေးပြီးသွေးတွင်းသကြားဓါတ်ကို မှန်ကန်စေတယ်လို့ ဆိုပါတယ်။

(၃) ဆီးချိုသွေးချိုအန္တရာယ်လျော့နည်းစေခြင်း

သကြားဓါတ်နဲ့ မကောင်းတဲ့ကိုလက်စထရောပါဝင်မှု နည်းပါးလွန်းခြင်းကြောင့် ဆီးချိုဝေဒနာသည်တွေအတွက်ဘေးဥပါဒ်ကင်းပါတယ်။ ရောဂါမရှိသေးသူတွေမှာလည်း အမျိုးအစား ၂ ဆီးချိုေရာဂါဖြစ်လာနိုင်တဲ့အန္တရာယ်လည်းနည်းပါးစေတယ်လို့ သိရပါတယ်။

(၄) ကင်ဆာဆေးတွေပိုထိရောက်စေခြင်း

သီဟိုဠ်စေ့မှာပါဝင်တဲ့anacardic acids၊ cardanols နဲ့ cardols တို့လို ဓါတ်တိုးဆန့်ကျင်ပစ္စည်းတွေ ကြွယ်ဝမှုကြောင့် အကျိတ်နဲ့ ကင်ဆာတို့အတွက် ကုသမှုခံယူနေဆဲ လူနာတွေအတွက် ထိရောက်မှုရှိစေတယ်လို့ သုတေသနတွေကတွေ့ရှိထားပါတယ်။

(၅) သွေးနီဥဆဲလ်ဖြစ်ပေါ်မှုကို အားပေးခြင်း

သီဟိုဠ်စေ့မှာ သံဓါတ်ရဲ့ဇီဝဖြစ်စဉ်အတွက် အထောက်အကူပေးတဲ့ ကော့ပါးဓါတ်ကြွယ်ဝပြီးသွေးနီဥဆဲလ်ဖြစ်ပေါ်မှုကို အားပေးကာ အရိုးနဲ့ကိုယ်ခံအားစနစ်ကို ကျန်းမာစေပါတယ်။ ဒါ့အပြင် အာရုံကြောစနစ်နဲ့ကျောရိုးစနစ်အတွက်လည်း အရေးပါပါတယ်။ကော့ပါးဓါတ်ချို့တဲ့ရင် အရိုးပွရောဂါ၊ နှလုံးခုန်မမှန်တာ၊သွေးအားနည်းရောဂါတွေဖြစ်စေတတ်ပါတယ်။

(၆) အရိုးနဲ့ ခံတွင်းကျန်းမာရေးကောင်းစေခြင်း

အရိုးနဲ့သွား ဖွံ့ဖြိုးမှုကျန်းမာရေးအတွက်လည်း အရေးပါတဲ့ phosphorous ဓါတ်ပါဝင်တာကြောင့်လည်း ပရိုတင်းချက်လုပ်မှုကို အထောက်အကူပေးပြီး ကာဗိုဟိုက်ဒရိတ်၊ အဆီဓါတ်တွေစုပ်ယူခြင်းနဲ့ ကလာပ်စည်းများရဲ့ကျန်းမာရေးကို ထိန်းသိမ်းစောင့်ရှောက်ပေးပါတယ်။

(၇) သွေးအားနည်းခြင်းကို ကာကွယ်ပေးခြင်း

သီဟိုဠ်စေ့တွေမှာ ခန္ဓါကိုယ်အနှံ့ အောက်ဆီဂျင်ပို့ဆောင်ရာမှာ အရေးပါတဲ့ သံဓါတ်ကြွယ်ဝပြီး အင်ဇိုင်းနဲ့ ကိုယ်ခံအားစနစ်ရဲ့လုပ်ဆောင်ချက်တွေကိုကောင်းမွန်စေပါတယ်။ သံဓါတ်ချို့တဲ့ရင်မောပန်းနွမ်းနယ်ခြင်း၊သွေးအားနည်းခြင်းတွေဖြစ်စေနိုင်ပြီးရောဂါကူးစက်မှုတွေ ဝင်ရောက်နိုင်ဖို့လွယ်ကူစေပါတယ်။

(၈) သည်းခြေကျောက်မဖြစ်အောင် ကာကွယ်ပေးခြင်း

သည်းခြေကျောက်ဆိုတာ သည်းခြေအတွင်း စုပုံလာတဲ့ ကိုလက်စထရောအပါအဝင်ကျောက်ခဲလိုလိုအနယ်အနှစ်တွေဖြစ်ပါတယ်။ သီဟိုဠ်စေ့လို ကျန်းမာရေးနဲ့ညီညွတ်တဲ့ အစေ့အဆံတွေကို မကြာခဏစားသုံးပေးရင် သည်းခြေကျောက်တည်နိုင်တဲ့ အန္တရာယ် နည်းပါးစေမှာဖြစ်ပါတယ်။

(၉) ကိုယ်ခံအားကောင်းစေခြင်း

ရောဂါပိုးမွှားတွေရဲ့ ရန်ကနေ ကိုယ်ခံအားစနစ်ရဲ့ခုခံကာကွယ်နိုင်စွမ်းကိုထောက်ကူပေးပြီး ပရိုတင်းချက်လုပ်မှုနဲ့ အနာကျက်မြန်ခြင်းအတွက် အရေးပါတဲ့ ဇင့် ဓါတ်က သီဟိုဠ်စေ့မှာ ပါရှိပါတယ်။ ဒီဓါတ်က ကိုယ်ဝန်ဆောင်တွေမှာ သန္ဓေသားဖွံ့ဖြိုးမှုအတွက်လည်း အရေးပါသလို ကလေးငယ်ရဲ့ဖွံ့ဖြိုးစအသက်အရွယ်အပိုင်းအခြားတွေမှာလည်း ခန္ဓါကိုယ်အနေအထားတည်ငြိမ်အောင် ထိန်းသိမ်းနိုင်စေပါတယ်။

(၁၀) အဆီပါဝင်မှု

သီဟိုဠ်စေ့မှာ ဗီတာမင်နဲ့ အာဟာရတွေအများကြီးပါဝင်တယ်ဆိုပေမယ့် အဆီဓါတ်ကလည်း များပါတယ်။ ဒါပေမယ့် ဒီအဆီတွေဟာလည်း အများစုက မပြည့်ဝဆီတွေနဲ့ အကျိုးပြုအဆီတွေဖြစ်ပါတယ်။

သီဟိုဠ်စေ့ရဲ့ဘေးထွက်ဆိုးကျိုး

ကျောက်ကပ်ကျောက်တည်ခြင်း –သီဟိုဠ်စေ့မှာ ခန္ဓါကိုယ်အတွင်း ကယ်လ်စီယမ်စုပ်ယူမှုကိုအနှောင့်အယှက်ဖြစ်စေတဲ့oxalate saltsတွေပါဝင်ပါတယ်။ ကယ်လ်စီယမ်တွေကို မစုပ်ယူနိုင်ဘဲ စုပုံသွားရင်ကျောက်ကပ်မှာကျောက်တည်စေနိုင်ပါတယ်။ ဒါ့ကြောင့်ကျောက်ကပ်မကောင်းတဲ့သူတွေမှာ သီဟိုဠ်စေ့ကို နည်းနည်းသာချင့်ချိန်စားသင့်ပါတယ်။

ဓါတ်မတည့်ခြင်း –ကျန်းမာရေးအကျိုးကျေးဇူးတွေများပေမယ့် အစေ့အဆံတွေနဲ့ဓါတ်မတည့်သူတွေအတွက်ကတော့ အန္တရာယ်ရှိနိုင်ပါတယ်။ သီဟိုဠ်စေ့နဲ့ သစ်ကြားသီးတို့လို အစေ့အဆံတွေကို ဓါတ်မတည့်မှုဟာ အနည်းအကျဉ်းဖြစ်ရင်ဖြစ်နိုင်သလိုပြင်းထန်တာလည်း ရှိနိုင်ပါတယ်။ အများအားဖြင့်တော့အောက်ပါနောက်ဆက်တွဲပြဿနာတွေ ရှိလာစေနိုင်ပါတယ် –

• အစာအိမ်နဲ့အူလမ်းကြောင်း ပြဿနာများ– တချို့မှာ မအီမသာဖြစ်ခြင်း၊ ဝမ်းပျက်ခြင်း၊ ဗိုက်အောင့်ခြင်း၊ချောင်းဆိုးခြင်း၊အော့အန်ခြင်း တို့ခံစားရတတ်ပါတယ်။
• အသက်ရှူလမ်းကြောင်းပြဿနာ– နှာရည်ကျခြင်း၊ ချောင်းဆိုးခြင်း၊ အသက်ရှူမဝခြင်းတို့ ဖြစ်နိုင်ပါတယ်။
ဒီထက်ပိုပြီးပြင်းထန်လာရင်တော့glottisedemaဒါမှမဟုတ် anaphylaxis လို့ခေါ်တဲ့ အသက်ဆုံးရှုံးရတဲ့အထိဖြစ်စေနိုင်တဲ့ အခြေအနေမျိုးကိုရောက်သွားနိုင်ပါတယ်။

Credit: Hello Health Group

ဆေးပညာပိုင်းဆိုင်ရာတည်းဖြတ်သူ Dr. Thurein Hlaing Win | ရေးသားသူ Aye Thi Mon

ပျားရည်က ဆေးဖက်ဝင်တယ်ဆိုတာကို ထွေထွေထူးထူးမပြောလည်း အများက လက်ခံထားပြီးသားပါ။ စားလိုက်ရင် ချိုချိုလေးနဲ့ အရသာရှိတဲ့ ပျားရည်လေးက ကျန်းမာရေး အာနိသင်ကြွယ်သလို အသားအရေကိုလည်း အများကြီး အထောက်အပံ့ပေးပါတယ်။ ခုတစ်ခေါက်တော့ ပျားရည်က အသားအရေ ကျန်းမာရေးကို ဘယ်လိုမျိုး ထောက်ပံ့ပေးသလဲဆိုတာ ကြည့်လိုက်ရအောင်လား။

ပျားရည် ကပေးတဲ့ အသားအရေ လှပမှု

ချိုချိုလေးနဲ့ အရသာရှိတဲ့ ပျားရည်က အရေပြားပေါ်မှာ လိမ်းပေးမယ်ဆိုရင်

• ဘက်တီးရီးယားတွေကို တိုက်ဖျက်နိုင်တယ်

ပျားရည်ကို အဓိက အသုံးပြုခဲ့ကြတာက အရေပြားပေါ်က ပိုးမွှားတွေကို တိုက်ဖျက်ဖို့ပါ။ အရေပြားပေါ်မှာ မမြင်နိုင်တဲ့ ဘက်တီးရီးယားများစွာ ရှိနေပြီး ဒီဘက်တီးရီးယားတွေက အရေပြားရောဂါ အမျိုးမျိုးကို ဖြစ်စေနိုင်ပါတယ်။ ဒါကြောင့် အရေပြားမှာ ပိုးဝင်ကူးစက်တာမျိုး သက်သာစေဖို့ဆိုရင် ပျားရည်ကို သုံးပေးလို့ရပါတယ်။

• အနာကျက် စေနိုင်တယ်

ထိခိုက်မှုတစ်ခုခုဖြစ်တယ် လိမ်းစရာဆေးတစ်ခုခု မရှိဘူးဆိုရင် အနာကို သေချာ စင်ကြယ်အောင်ဆေးလို့ ပျားရည်လေး ခပ်ပါးပါး လိမ်းထားပေးလိုက်ပါ။ ပိုးမဝင်အောင် ကာကွယ်ပေးသလို အနာကျက်မြန်စေဖို့ အကောင်းဆုံး အထောက်အပံ့ပေးနိုင်ပါတယ်။

• အရောင်ကျ စေနိုင်တယ်

ပျားရည်က အရောင်ကျစေနိုင်တဲ့ အာနိသင်ရှိတာကြောင့် ဝက်ခြံ၊ နှင်းခူတို့လိုမျိုး အရေပြားမှာ ရောင်ရမ်းစေနိုင်တဲ့ အရေပြား ပြဿနာတွေအတွက် အသုံးပြုပေးလို့ရပါတယ်။ ထိခိုက်မိတာ တစ်ခုခုကြောင့် ရောင်ရမ်းတာကို သက်သာစေဖို့လည်း ပျားရည်ကို အသုံးပြုပေးလို့ရပါတယ်။

• အရွယ်တင် စေနိုင်တယ်

ပျားရည်က အရေပြားကို ကျန်းမာစေနိုင်ပါတယ်။ နေ့စဉ် သေချာ သန့်စင်ထားတဲ့ မျက်နှာပေါ်မှာ ပျားရည်လိမ်းပေးမယ်ဆိုရင် အရေးအကြောင်းဖြစ်တာတွေကို သက်သာစေနိုင်ပြီး အရွယ်တင်စေနိုင်မှာပါ။ အရွယ်မတိုင်ခင် အိုမင်းတာမျိုး မဖြစ်အောင်လည်း ကာကွယ်ပေးနိုင်မှာပါ။

• ဝက်ခြံ သက်သာစေနိုင်တယ်

ပျားရည်က ဝက်ခြံသက်သာစေမယ့် သဘာဝ ကုထုံးတစ်ခုပါ။ ပျားရည်လိမ်းတာက ဝက်ခြံကြောင့်ဖြစ်တဲ့ အရေပြား နီမြန်းတာ၊ ရောင်ရမ်းတာတွကို သက်သာစေနိုင်သလို ဝက်ခြံဖြစ်စေတဲ့ ဘက်တီးရီးယားတွေကို အထိရောက်ဆုံး တိုက်ဖျက်ပေးနိုင်မှာပါ။
ဝက်ခြံရှိနေမယ်ဆိုရင် သန့်စင်ထားတဲ့ မျက်နှာပေါ်မှာ ပျားရည် ခပ်ပါးပါးလိမ်းလို့ ၁၀ မိနစ် ကနေ ၁၅ မိနစ်လောက် ထားလိုက်ပါ။ ပြီးရင် ရေနွေးနွေးလေးနဲ့ ဆေးချလိုက်ပါ။

• အပူလောင်တာကို သက်သာစေနိုင်တယ်

ပျားရည်က အရောင်ကျစေနိုင်သလို ဘက်တီးရီးယားတွေကို တိုက်ဖျက်ပေးနိုင်ပြီး အစိုဓာတ် ထိန်းပေးနိုင်တာကြောင့် အသားအရေကို အစိုဓာတ်ဖြည့်ပေးပြီး ချောမွေ့စေပါတယ်။ အပူလောင်တဲ့အခါ ဒဏ်ရာကို ရေနဲ့ သန့်စင်အောင် ဆေးကြောပြီးတာနဲ့ ပျားရည် ခပ်ပါးပါးလေး လိမ်းပေးရုံပါ။

• နေလောင်တာကို သက်သာစေတယ်

အရေပြားမှာ နေလောင်တာကို သက်သာစေဖို့ အတွက်လည်း ပျားရည်ကို လိမ်းပေးလို့ရပါတယ်။ နေလောင်တဲ့အခါ နေလောင်တဲ့နေရာကို ပျားရည် ခပ်ပါးပါး လိမ်းပေးရုံပါ။

• အရေပြား ကင်ဆာကို ကာကွယ်ပေးနိုင်တယ်

ပျားရည်က အရေပြား ကင်ဆာ အပါအဝင် အခြားသော ကင်ဆာတွေကို ကာကွယ်ပေးနိုင်ပါတယ်။ ပျားရည်က ကင်ဆာဆဲလ်တွေ ကြီးထွားမှုကို ဟန့်တားနိုင်ပါတယ်။ ဒါကြောင့် အရေပြားကင်ဆာအပါအဝင် ကင်ဆာတွေကို ကာကွယ်ဖို့အတွက် ပျားရည်ကို ဆေးဖြစ်ဝါးဖြစ် စားသုံးပေးလို့ရပါတယ်။

• အမာရွတ် သက်သာစေနိုင်တယ်

အမာရွတ်တွေရှိနေမယ်ဆိုရင် အမာရွတ်ပါးသွားစေဖို့ ဆေးအမျိုးမျိုး လိမ်းနေမယ့်အစား ပျားရည်ကိုသာ မှန်မှန်လိမ်းပေးပါ။ ဓာတ်တိုးဆန့်ကျင် အာနိသင်ပါဝင်တဲ့ ပျားရည်က ထိခိုက်ပျက်စီးသွားတဲ့ အရေပြားတစ်ရှူးတွေကို အားဖြည့်ပေးပြီး အမာရွတ်ပါးစေဖို့ အကောင်းဆုံး အားဖြည့်ပေးနိုင်ပါတယ်။ အမာရွတ်နေရာကို နေ့စဉ်မှန်မှန် ပျားရည် ခပ်ပါးပါးလေး လိမ်းရုံပါ။

• နှုတ်ခမ်းကွဲတာကို သက်သာစေနိုင်တယ်

နှုတ်ခမ်းကွဲတဲ့အခါ နှုတ်ခမ်းသားပေါ်ကို ပျားရည်လိမ်းပေးပြီး ၁၀ မိနစ် ကနေ ၁၅ မိနစ်အထိထားလို့ ရေအေးအေးလေးနဲ့ ဆေးချပေးလိုက်ပါ။ ဒီလို လုပ်ပေးတာက နှုတ်ခမ်းကွဲတာကို သက်သာစေနိုင်မှာပါ။

Credit : Hello Health Group